أنقل لكم سلسلة حكايات أبو خلفان وأم خلفان التي كانت تنشر في الصفحة الرياضية بجريدة الزمن في عام 2009 وهي من إعدادي تحت عنوان [رياضة المرأة] في عمود [هموم رياضية]
-
أم خلفان: ياربي هين خليت وطيتي الجديدة حال المشي هينها؟
-
أبو خلفان: ما شاء الله .. شرينا وطية جديدة ، وحال المشي بعد والله
تطورنا! هين سايرة تمشي يا أم خلفان؟
- حول عُمان!
-
حول عُمان مرة وحدة! نوبة زين بنرتاح من صراخش كمين سنة
-
أبو خلفان حشا بو يسمعك يقول ما كنك كنت باغي تستوي رئيس اتحاد! أشوفك انته
في وادي واللي يستوي في الرياضة في وادي غير!
-
هااا بدينا! يالله عايريني بعد بالشهادة الثانوية بو عندش!
-
يا رجال .. الحكومة مسوية حملة منشان الأوادم تسير تمشي
-
نوبة! و حال مو يعذبو الأوادم كذاك؟ وما راح يتعبوا هذيلا المساكين؟ مرة
وحدة حول عُمان ؟
-
صبرك يارب صبرك على رئيس الاتحاد المرتقب! أبوي راح يتقاسموا المسافة بينهم
-
ومو يوديش انتي تمشي مع العرب؟
- أبوي ما كلهم رجال خبروني انه شي
معهم حريم وقلت أسير أرابعهم
-
زين عجب صبري شوي صبري امبوني جاي معاش ما خليش تسيري وحدش
"وبعد نصف ساعة من المشي"
- أم خلفان متى بنوصل حشا من
ساعة ونحنا نمشي تراني هلكت وجاتني سخونة فيه حد ينظم مشي في هذا الجو الحار جذاك بنيبس
كلنا
-
أبوي دوك دوك اشرب ماي عن تطيح علينا وتفضًحنا.. الله يرحم أيام أول شوف تو
كيف استويو الأوادم ما قايمة تقدر تمشي كيلوين ورا بعضهم!
-
ومتى أمشي يعني في الصباح دوام وفي المسا شغل في الرياضة ، مالش تسرعي كذاك
حرصيني شوي آخذ نفسي تراني ما مشيت من زمان وانتي تمشي كما النشابة
- هييييه يا الرياضي ابوي تحرك .. هذي نتيجة اللي
يسكن في مسقط! وطول الوقت يترنبل في السيارة من مكان لمكان وداخل ذاك المكيف حتى
ولو ساير مكان قريب وشوف تو مو مسويتبك مسقط .. آه بس لو كان الشايب أبوك بعده عايش
علين تو وشافك كذاك وانت تحبي وتلهث كما الثور والله كان شخطك خيزرانين وخلاك تركض
كما البغل
-
أم خلفان وهين بغيتيني أمشي نوبة حيت السيح والا فوق الجبل؟ أنتي ما شايفة
مسقط كيف مستويه تو؟ مباني واسمنت في كل مكان وما مخلين مكان يستاهل نمشي فيه! الشيمة أم خلفان خفي السرعة شوي حشا متى بنوصل؟
أحس كأنه نبضات قلبي بدت تتسارع ترا ما زين
يطلع البني آدم كذاك فجأة ويمشي، الجسم ما يتحمل نعم ما يتحمل كل هذا الهلاك
-
عجب مو اللي يتحمله؟ صينية العيش اللي بو تضربها كل يوم وتلحقها برقدة لين
المغرب علين جاك السكري وأنت في عز شبابك؟ المشي زين حالك عسى ينزل ذا الكرش بو عندك
تراني سامعة أن أوادم مسقط تو استويو مريضين من الكسل وقلة الحركة
-
ااظهري .. وااركبي أم خلفان تراه الجو واجد ساخن و بصراحة ما قادر استمر كذاك
وراسي داير آاااه
-
ابو خلفان.. ابو خلفان .. وابووي طاح ابو خلفان
- الطبيب: حمدلله على سلامتك أبو خلفان حال مو انته
هامل صحتك كذاك ومخلي وزنك يزيد وتعرف زين انك مصاب بالسكري؟
-
الله يسلمك أبوي .. أنزين ساعدني وخبرني مو الحل تو ؟
-
أم خلفان: الحل انك تمشي كل يوم وحول عُمان
-
وااابوي عجب غبنا
حبيبة الهنائي
نشر في جريدة الزمن بتاريخ 2 يونيو 2009
http://archive.azamn.com/e_paper.php?start=30&dt=2009-06-02
ليست هناك تعليقات:
إرسال تعليق